دہشت گرد اسرائیلی فوج کے ہاتھوں مزید تین فلسطینی نوجوان شہید

رواں برس اسرائیلی فوج کی ریاستی دہشت گردی میں شہید ہونے والے فلسطینی نوجوانوں کی تعداد 125 سے تجاوز کر گئی۔

غزہ :  عالمی خبر رساں ادارے کے مطابق مغربی کنارے کے علاقے رام اللہ میں قابض اسرائیلی فوج نے دو بھائیوں 21 سالہ ظافر عبدالرحمان اور 22 سالہ جواد عبدالرحمان کو گولیاں مار کر بیدردی سے قتل کر دیا۔ ایک اور واقعے میں سفاک اسرائیلی فوج نے بیت امر میں ایک فلسطینی نوجوان کو گولیاں مار کر شدید زخمی کردیا جسے اسپتال لے جایا گیا تاہم زیادہ خون بہہ جانے کے باعث نوجوان جانبر نہ ہوسکا۔

خیال رہے کہ اسرائیل میں 4 سال میں پانچویں بار عام انتخابات ہوئے ہیں اور نتین یاہو ایک بار پھر وزیراعظم بن گئے ہیں لیکن حکومتوں کی تیزی سے تبدیلی کے باوجود فلسطینیوں کے بارے میں جارحانہ پالیسی اور قابضانہ ذہنیت میں کوئی تبدیلی نہیں آئی۔

اسرائیلی فوج کی بڑھتی ہوئی جارحیت کا اندازہ اس بات سے لگایا جا سکتا ہے کہ رواں برس اب تک 125 سے زائد فلسطینی نوجوان شہید ہوچکے ہیں جو 1967 میں اسرائیلی قبضے کے بعد سے ایک سال میں اب تک کی سب سے بڑی تعداد ہے۔ بیت امر میں شہید ہونے والے نوجوان کی شناخت نہیں ہوسکی۔ ایک دن میں اسرائیلی جارحیت میں شہید ہونے والے نوجوانوں کی تعداد 3 ہوگئی۔