مسلسل بے چینی اور ڈپریشن وقت سے پہلے بڑھاپے کا سبب بن سکتا ہے: تحقیق

بائی پولر کیفیت دماغ کو دو سال، ڈپریشن ایک برس اور اینزائٹی 8 ماہ تک بوڑھا کر سکتی ہے۔ ماہرین نے کہا ہے کہ ایسے افراد ورزش کو عادت بنائیں، دوستوں اور عزیزوں میں وقت گزاریں اور تنہائی کو حاوی نہ ہونے دیں۔

لاہور: (ویب ڈیسک) ایک تحقیق سے معلوم ہوا ہے کہ مسلسل ڈپریشن اور بے چینی (اینزائٹی) سے دماغ اصل عمر سے بوڑھا ہو جاتا ہے۔ ماہرین نے جو سب سے بڑا فرق دریافت کیا ہے وہ اصل عمر اور دماغی عمر کے درمیان دو سال کا فرق ہے۔ اس سے ظاہر ہوتا ہے کہ ذہنی تناؤ، ڈپریشن اور اینزائٹی یا بے چینی سے دماغ تیزی سے بوڑھا ہوسکتا ہے۔ لیکن اس کیفیت کو مناسب غذا، ورزش اور پرامید رہتے ہوئے اس کیفیت کو دور کیا جاسکتا ہے۔

 یوں بائی پولر کیفیت دماغ کو دو سال، ڈپریشن ایک برس اور اینزائٹی 8 ماہ تک بوڑھا کر سکتی ہے۔ ماہرین نے کہا ہے کہ ایسے افراد ورزش کو عادت بنائیں، دوستوں اور عزیزوں میں وقت گزاریں اور تنہائی کو حاوی نہ ہونے دیں۔ اس طرح ان کا دماغ تا دیر جوان رہ سکتا ہے۔ کنگز کالج لندن کے سائنسدانوں نے برطانوی ڈیٹا بیس، یوکے بایو بینک سے کل 110,000 افراد کا جائزہ لیا ہے۔ ٹیم کے سربراہ ڈاکٹر جولیان میوز کے مطابق اس میں انہوں نے بائی پولر ڈس آرڈر، ڈپریشن اور اینزائٹی کے شکار افراد کی کیفیت اور دماغ کا جائزہ لیا ہے۔

 انہوں نے لوگوں میں دماغی بڑھاپے کو ظاہر کرنے والے بایو مارکر اور دیگر عوامل کا باریکی سے مشاہدہ کیا ہے۔ بائی پولر ڈس آرڈر کے مسلسل مریضوں کا دماغ تیزی سے بوڑھا ہوتا ہے۔ یوں ڈپریشن اور بائی پولر کیفیت بطورِ خاص دماغ کی اعصابی صحت کو شدید متاثر کرتی ہے۔