چیف جسٹس نے فوری نوعیت کے مقدمات مقرر کرنے سے متعلق تجاویز طلب کر لیں

چیف جسٹس قاضی فائز عیسیٰ نے پاکستان بار اور سپریم کورٹ بار کونسل کے سربراہان سے اہم ملاقات کرتے ہوئے بینچز کی تشکیل، زیر التوا مقدمات اور فوری نوعیت کے مقدمات کو جلد سماعت کیلئے مقرر کرنے پرتجاویز طلب کر لیں۔

اسلام آباد: (قومی ڈیسک) چیف جسٹس کی پاکستان بار اور سپریم کورٹ بار کے سربراہان سے ملاقات، ملاقات کے بعد میڈیا سے گفتگو کرتے ہوئے چیئرمین ایگزیکٹو کمیٹی پاکستان بار کونسل حسن رضا پاشا نے بتایا کہ طے ہوا ہے کہ ایک کمیٹی بنائی جائے گی جس میں بار کے نمائندے کو بھی شامل کیا جائے گا اور فوری نوعیت کے مقدمات کو جلد سماعت کیلئے مقرر کرنے کیلئے حکمت عملی بنائی جائے گی۔

حسن رضا پاشا نے اس حوالے سے میڈیا سے گفتگو میں بتایا  کہ چیف جسٹس نے ہم سے تحریری تجاویز مانگیں ہیں، ہم نے عام آدمی کے مقدمات سماعت کے لئے مقرر کرنے سے متعلق تجاویز دی ہیں، ہمیں پوری امید ہے کہ چیف جسٹس نے ہم سے جو وعدہ کیا ہے اسے پورا کریں گے اور ہماری طرف سے دی گئی تجاویز پر عمل درامد یقینی بنایا جائے گا۔