مالی سال کے دوران سوتی دھاگے کی برآمدات میں 43 فیصد اضافہ

پاکستان بیورو برائے شماریات کی رپورٹ، جولائی تا اکتوبر 2023ء کے دوران سوتی دھاگے کی برآمدات سے ملک کو 408 ملین ڈالر کا زرمبادلہ حاصل، اکتوبر میں سوتی دھاگے کی برآمدات کا حجم 92 ملین ڈالر ریکارڈ کیا گیا۔

اسلام آباد: (اکانومی ڈیسک) ملک میں سوتی دھاگے کی برآمدات میں واضح اضافہ ہوا ہے۔ یہ اضافہ سالانہ بنیادوں پر ریکارڈ کیا گیا ہے۔ رواں مالی سال کے پہلے 4 ماہ کے دوران دھاگے کی برآمدات میں 43 فیصد کا نمایاں اضافہ دیکھنے میں آیا۔

پاکستان بیورو برائے شماریات کے مطابق جولائی تا اکتوبر 2023ء کے دوران سوتی دھاگے کی برآمدات سے ملک کو 408 ملین ڈالر کا زرمبادلہ حاصل ہوا۔ گزشتہ مالی سال کی اسی مدت کے مقابلہ میں دھاگے کی برآمدات میں 43 فیصد اضافہ ہوا ہے۔ گزشتہ مالی سال کی اسی مدت میں سوتی دھاگے کی برآمدات سے ملک کو 285 ملین ڈالر کا زرمبادلہ حاصل ہوا تھا۔

اکتوبر میں سوتی دھاگے کی برآمدات کا حجم 92 ملین ڈالر ریکارڈ کیا گیا۔ یہ اضافہ گزشتہ سال اکتوبر کے مقابلہ میں 88 فیصد زیادہ ہے۔ دوسری جانب ملک میں تیل و گیس کی پیداوار میں گزشتہ ہفتے کے دوران ہفتہ وار بنیادوں پر معمولی کمی ریکارڈ کی گئی۔