ممبئی انڈین کا نیا کپتان کون

انڈین پریمیئر لیگ کا نیا ایڈیشن، روہت شرما اور ہاردک پانڈیا میں کپتانی کی سرد جنگ، ہاردک پانڈیا اس سے قبل 2 سیزن گجرات ٹائٹنز کی طرف سے کھیل چکے ہیں۔

احمد آباد: (اسپورٹس ڈیسک) بھارتی کرکٹ ٹیم کے کپتان روہت شرما اور نوجوان آل راؤنڈر ہاردک پانڈیا میں ممبئی انڈینز کی کپتانی کی جنگ کا آغاز ہوگیا ہے۔ آئی پی ایل میں 5 بار ٹائٹل جیتنے والی ٹیم ممبئی انڈینز کی قیادت بھارتی کپتان روہت شرما کے پاس ہے۔ ساتھ ہی گجرات ٹائٹنز کو 2 بار ایونٹ کے فائنل میں پہنچانے والے ہاردک پانڈیا کو فرنچائز کی کپتانی دینے کی باز گشت سنائی دینے لگی ہے۔

گزشتہ دنوں ہاردک پانڈیا کی ممبئی کی ٹیم میں واپسی کی باضابطہ تصدیق ہوگئی ہے جس کے بعد قیاس آرائیاں کی جا رہی ہیں کہ ٹی 20 ورلڈکپ کو مدنظر رکھتے ہوئے ہو سکتا ہے کہ فرنچائز ٹیم کی قیادت روہت کے بجائے پانڈیا کے سپرد کر دے۔ وائٹ بال فارمیٹ میں آسٹریلیا کے ہاتھوں ہوم گراؤنڈ میں فائنل کی شکست کے بعد روہت شرما کی کپتانی خطرے میں ہے۔

واضح رہے کہ پانڈیا نے مسلسل 2 سال اپنی شاندار کپتانی کے ذریعے گجرات ٹائٹنز کی ٹیم کو 2 بار فائنل میں پہنچایا تھا جس میں ایک بار ٹرافی اپنے نام کی جبکہ گزشتہ سال فائنل میں انہیں چنائی سپر کنگز کے ہاتھوں شکست کا سامنا کرنا پڑا تھا۔ ہاردک پانڈیا بھارتی کرکٹ ٹیم میں بطور آل راؤنڈر کھیلتے ہیں۔