چیمپئنز ٹرافی کا مجوزہ شیڈول جاری

پاک بھارت ٹاکرا لاہور میں، میگا ایونٹ کے وینیوز کی تفصیلات سامنے آ گئیں، چیمپئنز ٹرافی کا فائنل 9 مارچ کو لاہور میں کھیلا جائے گا۔
لاہور: (اسپورٹس ڈیسک) اگلے سال پاکستان میں ہونے والی آئی سی سی چیمپئنز ٹرافی کے میچز کا مجوزہ شیڈول سامنے آ گیا ہے۔ 8 ٹاپ ٹیموں کو 2 گروپس میں تقسیم کیا گیا ہے، پاک بھارت ٹاکرا یکم مارچ جبکہ فائنل 9 مارچ کو لاہور میں ہوگا۔ پاکستان، بھارت نیوزی لینڈ اور بنگلا دیش کو گروپ اے جبکہ آسٹریلیا، انگلینڈ، جنوبی افریقہ اور افغانستان کو گروپ بی میں رکھا گیا ہے۔
آئی سی سی کے مجوزہ شیڈول کے مطابق میزبان پاکستان تینوں وینیوز لاہور، کراچی اور راولپنڈی میں گروپ میچز کھیلے گا۔ ٹرافی کا افتتاحی میچ 19 فروری کو کراچی میں پاکستان اور نیوزی لینڈ کی ٹیموں کے درمیان ہوگا۔ 20 فروری کو لاہور میں بھارت اور بنگلا دیش کی ٹیمیں آمنے سامنے ہوں گی۔ 21 فروری کو کراچی میں افغانستان اور جنوبی افریقہ کا میچ ہو گا جبکہ 22 فروری کو لاہور میں آسٹریلیا اور انگلینڈ کی ٹیمیں مد مقابل ہوں گی، 23 فروری کو لاہور میں بھارت اور نیوزی لینڈ کا میچ ہو گا۔
پاکستان اور بنگلا دیش 24 فروری کو راولپنڈی میں کھیلیں گے، 25 فروری کو افغانستان اور انگلینڈ کے میچ کی میزبانی لاہور کرے گا۔ 26 فروری کو راولپنڈی میں آسٹریلیا اور جنوبی افریقہ کا میچ ہوگا، 27 فروری کو لاہور میں بنگلہ دیش اور نیوزی لینڈ کی ٹیمیں ٹکرائیں گی۔ 28 فروری کو راولپنڈی میں افغانستان اور آسٹریلیا کی ٹیمیں کھیلیں گی۔
اسی طرح یکم مارچ کو روائتی حریف پاک بھارت ٹیموں کا ہائی وولٹیج ٹاکرا لاہور میں ہوگا۔ 2 مارچ کو راولپنڈی میں جنوبی افریقہ اور انگلینڈ کا میچ ہوگا۔ 5 مارچ کو پہلا سیمی فائنل کراچی جبکہ دوسرا سیمی فائنل 6 مارچ کو راولپنڈی میں رکھا گیا ہے۔ 9 مارچ کو چیمپئنز ٹرافی کا فائنل لاہور میں ہوگا۔