مہنگے آئی پی پیز سے معاہدے ختم کرنے پر غور

توانائی کمیٹی کے اجلاس کے بعد وزیر توانائی کی میڈیا سے گفتگو، آئی پی پیز سے متعلق اقدامات کے اچھے نتائج سامنے آئیں گے، زیادہ مہنگے آئی پی پیز کو نکالنے کے طریقہ کار اور قیمت کا جائزہ لیا جا رہا ہے۔ 

اسلام آباد: (اکانومی ڈیسک) تفصیلات کے مطابق زیادہ مہنگے آئی پی پیز سے معاہدے ختم کرنے پر غور کیا جا رہا ہے۔ اس حوالے سے وزیر توانائی اویس لغاری کا کہنا ہے کہ آئی پی پیز سے متعلق اقدامات کر رہے ہیں جس کے اچھے نتائج سامنے آئیں گے۔ یہ دیکھا جا رہا ہے کہ کس آئی پی پی کا کتنا عرصہ باقی رہ گیا، کس آئی پی پی سے ہمیں کتنا فائدہ اور کتنا نقصان ہے، ان تمام عوامل کا جائزہ لے رہے ہیں۔

توانائی کمیٹی کے اجلاس کے بعد میڈیا سے گفتگو کرتے ہوئے وزیر توانائی نے کہا کہ ملک میں بجلی کی طلب میں 10 فیصد تک کمی ہو گی۔ زیادہ مہنگے آئی پی پیز کو نکالنے کے طریقہ کار کا جائزہ لیا جا رہا ہے، ساتھ ساتھ یہ بھی دیکھا جا رہا ہے کہ آئی پی پیز کو نکالنے کی کیا قیمت ہو گی اور کیا آج ہم یہ قیمت برداشت کر سکتے ہیں؟ 

آئی پی پیز کے معاملے کو مختلف حوالوں سے دیکھا جا رہا ہے۔ وزیراعظم کی ہدایات کے مطابق بہت جلد اس پر کوئی نہ کوئی فیصلہ ہو گا۔ بجلی ٹیرف بڑھنے سے جنوری کے بعد ایڈجسٹمنٹ نہ ہونے سے قیمتیں کم رہیں گی۔